स्पर्धात्मक फायदा Competitive Advantage

                                          स्पर्धात्मक फायदा Competitive Advantage 

एका मुलाला जन्मापासूनच उजवा हात नव्हता. दहा वर्षाचा होता तेव्हा त्याने कराटे क्लब जॉईन करायचं ठरवलं. त्याला लवकरच आवड निर्माण झाले आणि तो नेहमी सरावासाठी जायला लागला. एकदा त्याने आपल्या गुरु जवळ स्पर्धेत भाग घेण्याची इच्छा दाखवली पण एका हाताने मी कराटे स्पर्धेत भाग घेऊ शकतो का याची त्याला शंका होती.

त्याच्या गुरूंनी त्याला सांगितलं की तू नक्कीच स्पर्धेत भाग घेऊ शकतोस आणि जिंकूही शकतोस. पण त्यासाठी तुला माझ्यावर विश्वास ठेवावा लागेल आणि मी जे सांगेन त्यानुसार तयारी करावी लागेल. मुलाने लगेच होकार दिला.

पुढचे काही दिवस त्याचे गुरु त्याला रोज एकच डाव शिकवत होते आणि त्याचा सराव करायला लावत होते. बरेच दिवस हेच चालू होतं. आपल्या क्लब मधील इतर मुलांना वेगवेगळे डाव शिकताना व वापरताना पाहून त्याला सारखं वाटत होतं की मला केवळ एकच डाव शिकवला जातोय. याच्याने मी कसा जिंकू शकेन?

न राहवून त्याने शेवटी गुरुजींना विचारलंच. गुरुजी म्हणाले, तू त्याची चिंता करू नकोस. माझ्यावर विश्वास ठेव आणि या एकाच डावाचा सराव कर. त्याने पुढे मनापासून सराव करायला सुरुवात केली.

काही दिवसानंतर स्पर्धेला सुरुवात झाली आणि हा मुलगा प्रत्येक फेरीमध्ये जिंकत जिंकत पुढे अंतिम फेरीतही पोहोचला. आणि आश्चर्याची बाब म्हणजे त्याने अंतिम फेरी देखील सहज जिंकली. हे पाहून त्याने,त्याच्या पालकांनी आणि इतर सगळ्यांनी गुरुजींना विचारलं की हे कसं शक्य झालं?

तेव्हा गुरुजींनी सांगितलं की मी त्याला जो डाव शिकवला होता त्यावर एकमेव बचाव म्हणजे प्रतिस्पर्ध्याच्या उजवा हात पकडणं हे होतं पण याला उजवा हातच नाही त्यामुळे कोणीही या डावापासून बचाव करू शकला नाही.

मित्रांनो ही झेन कथा आपल्याला थोडक्यात Competitive Advantage म्हणजे काय ते सांगते. अशी गोष्ट जी आपले स्पर्धक करू शकत नाहीत किंवा सहजासहजी कॉपी करू शकत नाहीत. 

चांगला Competitive Advantage तयार केला तर बिजनेस मध्ये स्पर्धकांवर मात करणे आणि जास्तीत जास्त ग्राहक मिळवणं सोपं होत जातं.